Sasken Shina ® GB

پرُجون

شرہ آیئ شِلوک

چل چل بُنکر شرہ آیک اشِی تھئ۔ رےۡ چیۡیِی ڇے پالےۡ تھیگِش۔ چھلو نے نومِہ گہ چِھبِیگِش۔ چھمِیاکوۡ چھلئ نوم شُرُجنا پالوۡ اسُو۔ مجِینوۡ چھلئ نوم ممُجنا پالوۡ نے پھتُہ چُھپئ چھلٹ پھچُڻا پالوۡ تھیگِہ۔ شُرُجنا پالوۡ گہ ممُجنا پالوۡ بینےۡ بِڜوتیۡک اسے۔ مگم پھچُڻا پالوۡ اڇھیموۡک اسُو۔

ہر چھک چلبُجِی چل آئ چرِجوک گئ توۡ چھلِہ سم تھے کھچِی بُجِش۔ رِس گہ ارُنِپر در کُرِینس۔ بُنر دُور بوسںۡگ گے چرِجِی ویوسںۡگ بلکال بِیش۔ دارج ویئ چھلو نومِہ دے ہو تِھیش۔ رِس لوکوۡ لوکوۡ تھے در وِیینس۔ در وِیے ڇُھپِہ دوجےۡ درُہ ویئ توم میَئ ڇِھیرِٹ پلِیجنس۔

ایۡک چھک بلکال آئ چرِجِی ویئ توم پالوۡٹ ہو تھیگِہ۔ رِس در وِیے ڇُھپِہ دوجےۡ درُہ ویئ ریۡسئ دُت پِیوک ڜاتےۡ۔ اِںۡڇک سےۡ دُریجوۡ رِہ پشِی دول بے ویئ کیڻکئ پھتُہ جپ بے رِہ نگہ تھیگُہ۔ چھلِہ پشِی ریۡسئ ہِیوۡ ممڜ بُگُہ۔ روۡس توم ہِیر گُڻیگُہ ”لُڜٹاک آئ چرِجوک گئ توۡ گے انِہ چھلِہ کھام۔“

چلبُجِی چل آئ سےۡ چھلِہ کھچِی بُنٹ نِکھتِہ۔ ہوۡ اِںۡڇ دول بے دارج ویئ رِنئ نومِہ دے ہو تھیگُہ ”شُوںۡرُجنا پاںۡلو، ماںۡمُجنا پاںۡلو، پھاںۡچُڻا پاںۡلو دںۡر وِںۡیات!“ شُرُجنا پالوۡ گہ ممُجنا پالوۡس در نے وِیون تھیگےۡ۔ مگم پھچُڻا پالوۡس رِنئ موۡر کوۡڻ نے دے پِرِک دے گے در وِییگُہ۔ در وِییگُس اکِی اِںۡڇ سےۡ در گڑںۡگ تھے ارُہ ویئ روۡ لپ تھیگُہ۔ شُرُجنا پالوۡ گہ ممُجنا پالوۡ رلو اُڇیئ ڜاتوۡ جیلر گے تھپ جوںۡڙِکئ کِھرِہ اچِتےۡ۔

بلِکال آئ ویئ ڇکئ توۡ ڈُکُرِی در گڑںۡگ ہن، پِرِک دے ارُہ گئ توۡ پالےۡ نُش۔ اے کھین ریۡسئ ہِیر جیک گہ نے پولِہ۔ کھینک سمبہ تھے پالےۡ اُڈروک نِکھام تھے نِکھتِہ۔ ہوۡ سات نے ہررے ڜاتوۡ جیلر رِنئ اُڈور تھیگِہ۔

تُشار مُڇھو گیِش اکی ریۡسئ پالےۡ تھپ جوںۡڙِکئ کِھرو نِکھیئ ریۡسٹ ہو تھیگےۡ۔ پھر بے ڇکئ توۡ شُرُجنا پالوۡ گہ ممُجنا پالوۡ چوۡکےۡ ہن۔ ہئ تھے رِنوۡوار گئ۔ نے لوکوۡ لوکوۡ رِنوۡجوۡ پھچُڻا پالئ کھوۡجیگِہ۔ رِس چُھپجوۡ چگا تھے ولے بڜ تھیگےۡ۔ رلو توم پالےۡ گِنی ہوۡئ تھے ڈُکُرِر وتِہ۔

ڈُکُرِر ولے پالوۡٹ دُت دیگِہ۔ نے رِہ سم تھے کھچی اکی اکھرکچ گئ۔ اکھرکچ گے سم تِینےۡ کھٹرِہ تھرے توم ڜِںۡگوۡج ڜاریگِہ۔ رلو ڙِیک چِھنے اِںۡڇ بییئ جیلوار گئ۔

جیلر بُجِش اکی ریۡسٹ اِںۡڇ پوۡنِر ڈوۡک بُگُہ۔ ایۡک نے ریِی اِںۡڇئ اِڅِٹ ڇُھپ دیگِہ نے کھٹرِہ ڜے ریۡسئ ڈیر تھرک تھیگِہ۔ ڈیر تھرک تھیگِش نلا اکی پھچُڻا پالوۡ ڈیۡرجوۡ تڜ بے درُہ وتُہ۔ اِںۡڇ پار پِھرِہ گے ٹم بے مُووۡ۔

دُو دیزو مجا اکی پھچُڻا پالوۡ بِلِجی ہگُٹوۡ سمک بُگُس۔ رلو پھچُڻا پالوۡ گِنی ڈُکُرِر ولیگِہ۔ ڈُکُرِر ولے روۡ کُوتر وِیگِہ۔ مازکجوۡ ہوۡ پھچُڻا پالوۡ ییوک بڜ بُگُہ۔

آلو پھتُہ ما پالےۡ گٹِہ بے بُنج گے چرِیجنس۔